Настаўнікамі застаюцца на ўсё жыццё
Даўно адзначана і праверана часам, што выпадковыя людзі ў школе не затрымліваюцца. Застаюцца толькі тыя, хто любіць сваю работу і вучняў.
У Пагародзенскай сярэдняй школе шмат таленавітых педагогаў. Напярэдадні Дня настаўніка мне хочацца расказаць пра цудоўнага чалавека і педагога, які дарыў дзецям сваю любоў, цяпло, трывалыя веды на працягу сарака васьмі гадоў. Гэта былы настаўнік біялогіі нашай школы Крысціна Станіславаўна Груца. Яшчэ будучы вучаніцай, яна захаплялася біялогіяй і хіміяй, таму пасля заканчэння школы паступіла ў Мінскі дзяржаўны педагагічны інстытут імя М. Горкага (цяпер — М.Танка) на біялагічны факультэт, які паспяхова закончыла ў 1975 годзе. Малады педагог-біёлаг разам з мужам прыехала ў Пагародна. Не адразу давялося працаваць па спецыяльнасці. Паспрабавала сябе на пасадзе выхавацеля групы падоўжанага дня, піянерважатай.
З першых хвілін сустрэчы гэта жанчына звяртае на сябе ўвагу: заўсёды добразычлівая, ветлівая, энергічная. Яе мяккі голас, добрыя ласкавыя вочы прыцягваюць да сябе лю-дзей, зараджаючы аптымізмам, вераю ў свае сілы. Крысціна Станіславаўна надзелена цудоўнымі якасцямі: пра-статой, адкрытасцю, інтэлегентнасцю, гатоўнасцю прыйсці на дапамогу. Прынцып яе работы — асцярожна і беражліва дапамагчы дзіцяці раскрыцца, усяліць у яго ўпэўненасць, даць адчуць сваю каштоўнасць як асобы.
Шмат сіл і энергіі аддала Крысці-на Станіславаўна сваім вучням, навучыўшы іх не толькі разбірацца ў пытаннях біялогіі, але і ў радасці пазнання. Няма такой справы, з якой бы настаўніца не справілася. Яе вучні паспяхова прымалі ўдзел у алімпіядах, эколага-біялагічных канферэнцыях, шматлікіх конкурсах. Вось толькі некалькі прыкладаў за апошнія гады. У 2013 годзе Кацярына Дайлідка заняла 3-яе месца на абласным этапе; у 2014-ым Дзіяна Зуевіч заваявала 3-яе месца на раённым этапе. 2015 год таксама быў значным для настаўніцы: вучань 7 класа Раман Шалкоўскі стаў пераможцам раённай алімпіяды па біялогіі, а васьмікласнік Іосіф Календа атрымаў другое месца. Яе выпускнікі цяпер паспяхова працуюць у самых розных галінах. Многія паступілі ў медыцынскія ўніверсітэты, а таксама ў педагагічныя на біялагічны факультэт.
Педагагічнае майстэрства Крысціны Станіславаўны немагчыма ацаніць ніякімі катэгорыямі. Кожны, хто працуе ў школе, працуе на будучае. Дарэчы, настаўнікам біялогіі з гэтага навучальнага года працуе былая выпускніца школы Аляксандра Аляксандраўна Буклярэвіч, у мінулым вучаніца Крысціны Станіславаўны. Яна з задавальненнем выкладае біялогію ў роднай школе, у чарговы раз выкарыстоўваючы настаўніцкі талент любімага педагога. Спадзяёмся, што і ў студэнта-першакурсніка біялагічнага факультэта БДУ Андрэя Жукоўскага здзейсняцца ўсе мары, якія ён давяраў Крысціне Станіславаўне.
К.С. Груца не толькі выдатны педагог, але і клапатлівая жонка, маці, бабуля. Разам з мужам Антонам Іванавічам выгадавалі і выхавалі дзвюх дачок Вераніку і Ганну, цудоўных лю-дзей і граматных спецыялістаў. Вера-ніка, у якой з дзяцінства выхоўвалася любоў да прыроды, звязала сваё жыццё з экалогіяй. А малодшая, як маці, стала настаўніцай, толькі пачатковых класаў.
У гэтым навучальным годзе Крысціна Станіславаўна не працуе ў школе, але 1 верасня для яе па-ранейшаму радасны і святочны дзень. Настаўнікамі застаюцца на ўсё жыццё, пагэтаму не магла яна не прыйсці на ўрачыстую трыццаць дзявятую лінейку ў Пагародзенскай школе.
Жадаю Вам, Крысціна Станіславаўна, адчуваць сувязь са сваімі вучнямі і былымі калегамі праз многа гадоў пасля працы ў школе. Няхай і ў далейшым людзі побач з Вамі зараджаюцца энергіяй і атрымліваюць запал бадзёрасці!
Алена ЛАСТОЎСКАЯ,
настаўніца Пагародзенскай СШ.
Фота Алега БЕЛЬСКАГА.