20 жніўня над Радунню гучалі песні і віншаванні з юбілеем (Дапоўнена)
З самай раніцы радунцы прымалі віншаванні з 630-годдзем пасёлка. Ветэранаў Вялікай Айчыннай вайны Веру Філіпаўну Цімафееву, Івана Адамавіча Носаля і Юльяна Мацвеевіча Адаміцкага наведалі госці – прадстаўнікі раённага аб’яднання прафсаюзаў, раённага савета ветэранаў і мясцовай сацыяльнай службы. “Дзякуй за перамогу, за мір над галавою”, - казалі ім.
Шэраг віншаванняў заслужаных працаўнікоў і ветэранаў працы працягнулі ўжо на цэнтральнай сцэне ў Радуні старшыня райвыканкама Мікалай Аркадзьевіч Розум, старшыня райсавета дэпутатаў Віктар Віктаравіч Роік, старшыня раённай арганізацыі РГА “Белая Русь” Леанід Вацлававіч Адамоніс і старшыня раённага аб’яднання прафсаюзаў Алена Мар’янаўна Ястрэмская.
І загучалі песні… Іх дарылі радунцам госці з Шальчынінкайскага раёна, Іўеўскага і Зельвенскага, а таксама, канешне ж, землякі. Народныя ўмельцы прывезлі на розны густ вырабы, зробленыя ўласнымі рукамі. А работнікі культуры на сваіх падворках увасобілі мясцовы нацыянальны каларыт. Тут былі прадстаўлены і беларуская, і руская, і літоўская, і яўрэйская і польская, і іншыя кухні.
З розных куточкаў Радуні чулася: “Са святам, старажытны і любы пасёлак!”