Дзень вышыванкі ў Воранаве: мова ― гэта душа народа, адзенне — яго твар (Фота)
Воранава, як і ўся краіна, рыхтуецца да святкавання галоўнага дзяржаўнага свята — Дня Незалежнасці. І ў райцэнтр атмасфера народных гулянняў прыйшла загадзя. Пляцоўкі з разнастайнымі забавамі ў гарадскім парку сталі своеасаблівай рэпетыцыяй вялікага святкавання. Але ўвагай гасцей завалодалі не шчыльныя гандлёвыя шэрагі, а Дзень вышыванкі пад эгідай Беларускага рэспубліканскага саюза моладзі.
— Мяняецца жыццё, цікавасць да сваіх каранёў, велізарнага багацця, якім мы валодаем у плане традыцыйнай культуры. Пачынаючы з вышымайкі ці стужкі з беларускім арнаментам, мы можам прыцягнуць увагу да вельмі сур’ёзных рэчаў, — упэўнены актывісты БРСМ. — Гэтыя знакі з’явіліся калісьці на белым адзенні як абярэгі, іх можна чытаць як пісьмо. Кожны сімвал валодае магутнай энергетыкай. Геаметрычны малюнак — гэта просьбы той жанчыны, якая вышывала. Просьбы аб здароўі, сіле, шчасці, дабрабыце. І сёння мы таксама жадаем нашым землякам усяго найлепшага, — павязваючы чароўныя стужачкі воранаўцам, казалі дзяўчаты.
Тэматычным дапаўненнем сталі выстава “Сэлфі&фота ў вышыванцы” і дэфіле ў касцюмах з нацыянальнымі элементамі “Узоры сэрцу дарагія”. Усе жадаючыя змаглі ўпрыгожыць свой вобраз малюнкам на твары. Пляцоўка аквагрыму сёння таксама працавала ў стылі фолк.
Косы і пляценні з валасоў займаюць асаблівае месца ў сэрцы жанчыны. Яшчэ ў дзяцінстве косы заплятае мама, такія прычоскі мы рабілі лялькам, і нават дарослыя прадстаўніцы не адмаўляюцца ад гэтай рамантычнай атрыбутыкі ў вобразе. Ужо колькі сезонаў запар косы і пляценні складаюць вядучую модную тэндэнцыю. А калі яны аздоблены стужкай з беларускім арнаментам, што можа быць прыгажэй?
Дзе радзімы нашай пачатак, высвятлялі падчас тэматычнай віктарыны. Пытанні аб годзе нараджэння Воранава, аўтары слоў гімна пасёлка, выглядзе яго герба і іншыя, здаралася, ставілі ў тупік удзельнікаў апытвання. Але многія ўсё ж атрымалі цудоўны сувенір за правільны адказ. Карысна цікавіцца гісторыяй малой радзімы, землякі.
Лашчылі слых беларускія песні з канцэртнай праграмы “Пяю табе, мая радзіма”. На летняй эстрадзе гучалі брэндавыя “Прывітальная”, “Тры дубы”, “Туман ярам”, “Адам і Марыля”, “Воранаўскі край” народнага ансамбля народнай музыкі і песні “Лявоны”. Сваіх аматараў і гледачоў знайшла і выстава работ аддзела рамёстваў і традыцыйнай культуры.
Галіна ШЛЕМПА.
Фота аўтара.
Жаль что это дошло до вас только через 24 года и только по указанию сверху.
И говорите вы это только в этот день, посмотрим ваши дела дальше...