Дакрануліся да гісторыі... Выхаванцы-дашкольнікі Паляцкішскай базавай школы наведалі школьны краязнаўчы музейны пакой “Спадчына”

Выхаванне патрыёта пачынаецца не з гучных лозунгаў, а з першага знаёмства з гісторыяй роднай вёскі, з аповедаў пра мужнасць землякоў і павагі да памяці продкаў. Выхаванцы-дашкольнікі Паляцкішскай базавай школы наведалі школьны краязнаўчы музейны пакой “Спадчына”. Візіт стаў для іх сапраўдным урокам мужнасці і гонару.

Экспазіцыя, прысвечаная падзеям Вялікай Айчыннай Вайны, стала цэнтральным месцам для маленькіх наведвальнікаў. Дзякуючы асаблівай атмасферы далёкае трагічнае мінулае ажыло перад вачыма дзяцей. Школьнікі з вялікай цікавасцю знаёміліся з ваеннай атрыбутыкай: каскамі, гільзамі і франтавымі лістамі-трохкутнікамі, якія беражліва захоўваюць цеплыню рук байцоў. Кожны экспанат — гэта нямы сведка гераізму, які дапамог дзецям адчуць подых той суровай эпохі.

Асаблівую ўвагу экскурсавод-вучань надаў аповеду пра герояў-землякоў. Дашкаляты з заміраннем сэрца слухалі гісторыі пра мужнасць салдат і партызан, якія абаранялі нашу зямлю, каб сённяшнія дзеці маглі расці пад мірным небам. Прозвішчы, знаёмыя дзецям па назвах вуліц, цяпер набылі для іх новы сэнс — цяпер гэта не проста надпісы, а рэальныя людзі-героі.

Патрыятычнае выхаванне праз знаёмства з гісторыяй — адзін з важных кірункаў фарміравання асобы. Візіт у “Спадчыну” пакінуў глыбокі след у дзіцячых сэрцах. Гледзячы на твары дзяцей, якія разглядалі ваенныя рэліквіі, становіцца зразумела: сувязь пакаленняў не перарываецца.

Менавіта так, праз пашану да подзвігу герояў і любоў да сваіх каранёў, мы гадуем сапраўдных грамадзян нашай краіны.

Надзея ЖУКОЎСКАЯ,

выхавальнік дашкольнай адукацыі

ДУА “Паляцкішская БШ”.