Гродзенскія пісьменнікі і паэты прадставілі сваю творчасць на XXXIII Дні беларускага пісьменства
На фестывалі кнігі і прэсы кожная вобласць старалася вылучыцца, прадстаўляючы свае інтэрактывы. Але адным з самых ажыўленых месцаў стаў тэматычны намёт Гродзенскага рэгіёна. На пляцоўцы разгарнулася імправізаваная паэтычная сцэна. Аўтары Прынёманскага краю, члены Саюза пісьменнікаў Беларусі, зачыталі свае лепшыя вершы, у тым ліку і на беларускай мове. Эмацыйныя чытанні прыцягнулі нямала гасцей і прымушалі слухаць паэтаў, не адрываючы позірку.
Настрой у гродзенскіх пісьменнікаў сёння асабліва святочны. Усё таму, што наш зямляк, намеснік старшыні Гродзенскага абласнога аддзялення Саюза пісьменнікаў Беларусі Дзмітрый Радзівончык атрымаў найвышэйшую літаратурную ўзнагароду – Нацыянальную літаратурную прэмію ў намінацыі “Лепшы твор літаратурнай крытыкі і літаратуразнаўства”.
Кніга "Масты і берагі", за якую пісьменніка і ўзнагародзілі, выйшла ў снежні 2025 года ў выдавецкім доме "Звязда". Праца прысвечана даследаванням сучаснай літаратуры, у прыватнасці – аўтараў з Гродзенскай вобласці.
Дзмітрый Радзівончык упэўнены – кнігу можна двойчы назваць для яго дэбютнай. Яна ўпершыню напісана на беларускай мове і ўпершыню выйшла пры падтрымцы Міністэрства інфармацыі Рэспублікі Беларусь па праграме сацыяльна значнай літаратуры.
Выпусцілі працу тыражом у 500 экзэмпляраў. Нягледзячы на тое, што выданне спецыялізаванае і мае вузкую мэтавую аўдыторыю, раскупілі кнігі ўсяго за месяц.
– Сказаць, што я шчаслівы, - не сказаць нічога. Гэта мая найвышэйшая ўзнагарода. Я добра разумею, што вышэй за гэты поспех у маім творчым жыцці ўжо не будзе. Я быў ашаломлены, калі ўбачыў, з якімі гігантамі айчыннай літаратуры мне выпала шчасце стаяць на сцэне падчас цырымоніі ўзнагароджання. Гэта аўтары, якіх праходзяць у школьнай праграме, якіх па праве можна лічыць жывымі класікамі, – падзяліўся Дзмітрый Радзівончык.
Зараз пераможную кнігу купіць ужо нельга, але можна знайсці ў Гродзенскай абласной бібліятэцы імя Карскага.
Анастасия Одосий
Фото:автора