У Воранаве гучна і хораша адсвяткавалі Масленіцу
Задоўга да свята на ўсё наваколле райцэнтра разлівалася музыка, запрашаючы воранаўцаў на плошчу. Першымі на заклік адгукнулася дзятва, падцягнуліся і дарослыя. І не пашкадавалі! Дзеці ласаваліся салодкай ватай, спаборнічалі ў гульнях, ездзілі на цягнічку, гулялі ў латарэю аддзела рамёстваў і традыцыйнай культуры. Дарослыя саграваліся чаем і частаваліся шашлыкамі, прыгатаванымі работнікамі Воранаўскага філіяла аблспажыўтаварыства. І разам усё Масленіцу сустрэлі, з Зімой развіталіся, спаліўшы яе пудзіла.
Ды і пра бліны не забыліся. Як без іх Масленіцу святкаваць. Сонейкам на талерцы частаваліся з задавальненнем усе. Камусьці смакавалі бліны з мясам, ікрой, а хтосьці шукаў іх з тварагом і згушчонкай. Ды што тут казаць, усе яны былі цудоўнымі, бо прыгатаваны з любоўю радунскімі, нацкімі, доцішскімі, больцішскімі, пагародзенскімі, паляцкішскімі, беняконскімі, больцініцкімі, тракельскімі, пераганцаўскімі, жырмунскімі і банстунскімі гаспадынькамі.