Радунскае гулянне — для ўсіх замілаванне
Удзельнікі свята да Дня народнага адзінства ў Радуні, атрымаўшы асалоду ад музычных нумароў, знаходзілі забавы па душы у парку.
Гістарычная пляцоўка «Адгалоскі гісторыі майго пасёлка» Радунскай сярэдняй школы адпраўляла гледачоў у падарожжа па малой радзіме, згадваючы важныя звесткі роднага населенага пункта.
Моладзевая пляцоўка «Беларусь — гэта мы!» заклікала творчых людзей размаляваць яркімі краскамі Беларусь і адрасаваць пасёлку-юбіляру найлепшыя пажаданні.
На этнападвор’і “Скарбы беларускай хаты” кожны меў магчымасць пасмакаваць з рук гасціннай гаспадынькі духмяны хлеб, пазнаёміцца з бытам продкаў.
Не абыходзілі стараной госці свята і міжнацыянальную інтэрактыўную пляцоўку “У творчым сяброўстве пад мірным небам Беларусі”, спартыўна-конкурсную “Адзіныя з табой, мой родны пасёлак!”
Горад майстроў часткова адлюстраваў цуды чалавечай працы і фантазіі ў розных тэхніках і з выкарыстаннем разнастайных матэрыялаў. Выстава-продаж не пуставала: карысталіся попытам вырабы з дрэва, нітак, канзашы з атласных стужак і іншыя.
“Класна!” — характарызавалі адпачынак дзеці, якія бавілі час ля надзімных атракцыёнаў і час ад часу ўтваралі чэргі за салодкімі прысмакамі.