Нябеснае святло ў шкле адлюстравана. У свята Божай Міласэрнасці ў воранаўскім касцёле асвяцілі вітражы
У Год добраўпарадкаванння воранаўская каталіцкая святыня і яе тэрыторыя значна змяняюцца, становяцца больш утульнымі. Нядаўна святары ўвасобілі ў жыццё даўнюю задуму — усталявалі дванаццаць вітражоў. У свята Божай Міласэрнасці іх асвяціў гродзенскі біскуп Уладзімір Гуляй.
Заходзіш у касцёл — і застываеш на месцы. Свет, які праламляецца праз вітражы, надае велічнасць выявам, ад прыгажосці замірае сэрца. Міжволі ўзнікае адчуванне, што ты знаходзішся пад пільным поглядам святых. Настолькі вітражы ствараюць у храме атмасферу таінства! І ўзнікае настрой на духоўнае яднанне з Богам і іншымі вернікамі.
— Наш храм мае статус санктуарыя, чым прыцягвае ўвагу вернікаў з розных куткоў Беларусі. Таму ён павінен мець эстэтычны выгляд. Пяць гадоў назад мы пачалі збіраць сродкі на яго абнаўленне — усталяванне вітражоў. Дзякуючы Божай дапамозе, намаганням вернікаў і спонсараў наша святыня стала прыгажэйшай, — патлумачыў настаяцель касцёла Святых апосталаў Сымона і Юды Фадзея Анджэй Вітэк. — На галоўным уваходзе ў касцёл размясціліся вітражы з выявамі апекуноў нашага прыхода — апосталаў Сымона і Юды Фадзея. Астатнія вітражы аб’яднаны адной тэматыкай — Божай Міласэрнасці. Менавіта сястра Фаўстына, беларускі бласлаўлёны ксёндз Міхаіл Сапоцька, Ян Павел ІІ, святы Вінцэнт Палоцці былі яго прыхільнікамі. Дый выявы прабачэння блуднага сына бацькам, споведзі падкрэсліваюць, наколькі Бог міласэрны і прабачае нас.
Радасную падзею з воранаўскімі вернікамі раздзяліў гродзенскі біскуп Уладзімір Гуляй, які асвяціў вітражы. У прамове ён падкрэсліў, бачна, што святыня з’яўляецца агульным домам для прыхаджан — настолькі шмат намаганняў яны прыкладаюць для яе аздаблення. Як адна сям’я мы молімся тут за свае сем’і, зямлю, будучае.
Марына КАНДРАТОВІЧ.
Фота Алега БЕЛЬСКАГА.
