Ваш выхад, юбіляры!

У 635-гадовай Радуні ёсць свае музычныя брэнды. Мясцовыя жыхары не задумваючыся іх назавуць — народны ансамбль народнай песні "Зараніца" і ўзорны ансамбль танца "Радунскія Салавейкі". Гэтыя калектывы таксама адзначылі юбілеі. Першы — у мінулым годзе, другі — сёлета. Іх выхаду на святочную сцэну вельмі чакалі землякі. А таму і шчыра сустракалі апладысментамі.

З 1987 года вядзе адлік свайго творчага жыцця "Зараніца". За гады існавання ёю дадзена звыш 700 канцэртаў, рэпертуар складае больш 90 песен. Сёння калектыў аб'ядноўвае людзей розных прафесій, якія любяць народную песню. Першым творчым кіраўніком яго была Аліна Булгак, якая сапраўды ўлажыла ў яго свае сэрца і душу. За 21 год кіравання калектывам ансамбль неаднаразова станавіўся лаурэатам і дыпламантам шматлікіх конкурсаў і фестываляў. На свяце ў Радуні Аліна Аляксандраўна была ганаровым гледачом і прымала музычныя віншаванні ад артыстаў "Зараніцы". Ансамблем кіравалі таксама Валянціна Драбышэўская, Андрэй Жэгздрын, а сёння – самая маладая удзельніца Лізавета Хіневіч.

Не адно пакаленне дзяцей вырасла разам з "Радунскімі салавейкамі". З 1991 года калектыў штогод папаўняецца танцорамі, сёлета ўтворана чатыры рознаўзроставыя групы. За 30 гадоў у творчай скарбонцы ўзорнага ансамбля танца шмат перамог у раённых, абласных, рэспубліканскіх і міжнародных конкурсах. Увесь гэты час нязменным кіраўніком з’яўляецца Францішка Габіс. Сёння разам з харэографам Святланай Карабейнік яны падтрымліваць высокі ўзровень майстэрства яго таленавітых удзельнікаў.