У г.п. Радунь прайшоў IХ адкрыты раённы фестываль народных традыцый і мастацтва “Кола сяброўства”
Непаўторныя “Лявоны”, вясельныя гулянні, горад майстроў і добрыя ўсмешкі землякоў. У мінулую нядзелю дзявяты раз шмат-нацыянальная Радунь сустракала ўдзельнікаў раён-нага фестывалю народных традыцый і мастацтва, які з’яўляецца адным з самых цікавых у разнастайнай палітры брэндавых мерапрыемстваў Воранаўшчыны.
Па традыцыі ў мясцовых святынях прайшлі службы за яднанне народаў з удзелам шматлікіх вернікаў. Культура і рэлігія служаць адной мэце — несці мір і высокія духоўныя каштоўнасці, захоўваць традыцыі продкаў.
Прывітаў суайчыннікаў і адкрыў фестываль старшыня Воранаўскага райвыканкама Дзмітрый Захарчук.
— У Год народнага адзінства свята песень, абрадаў і звычаяў вучыць кожнага з нас паважаць свае карані, з пашанай ставіцца да мінуўшчыны і ствараць атмасферу талерантнасці ў грамадстве. Стагоддзямі на Воранаўшчыне фарміраваўся ўнікальны характар этнакультурнага добрасуседства розных народаў. Гэтае свята — сімвал дружалюбнасці і адкрытасці не толькі нашага раёна, але і краіны ў цэлым. Жадаю ўсім прысутным моцнага здароўя, міру, дабрабыту і добрага настрою на святкаванне, а фестывалю — росквіту!У шэсці пад флагамі розных краін работнікі культуры прадэманстравалі нацыянальныя касцюмы і ручнікі як галоўныя атрыбуты побыту чалавека. Менавіта яны адлюстроўваюць гісторыю народа, яго дух, творчае натхненне.
— Радунь — шматнацыянальны паселак. Больш за дзве тысячы беларусаў, палякаў, рускіх, яўрэяў, цыган знайшлі ў гэтым куточку свой родны дом. Свята заклікана засведчыць мір і згоду, павагу і ўзаемаўзбагачэнне розных традыцый, якія здаўна існуюць на нашай зямлі. Радунцы заўсёды чакаюць фестываль і рады сустракаць гасцей, — падкрэсліў старшыня мясцовага сельвыканкама Андрэй Шынковіч.
Гучным, віртуозным і пранікнёным выкананнем музычных твораў на беларускай, рускай, польскай і літоўскай мовах распачаў канцэртны вянок народны ансамбль народнай музыкі “Лявоны”. Задаволеныя гледачы, сярод якіх, хачу зазначыць, былі прадстаўнікі розных пакаленняў, кожны выступ прымалі бурнымі апладысментамі. Песенную эстафету перанялі калектывы і выканаўцы аматарскай творчасці нашага раёна і са Шчучыншчыны. “Кола сяброўства” папоўніла фолк-група “Гуляй, бульбаш!”Конкурс на лепшае нацыянальнае падвор’е, якіх сёлета было восем, раскрыў вясельныя традыцыі народаў. Разнастайныя тэматычныя атрыбуты, рэлігійныя абрады, кулінарныя шэдэўры, каларытныя танцы — каб змяніць краіну, дастаткова было зрабіць некалькі крокаў. Умоўнае спаборніцтва завяршылася перамогай беларускага падвор’я, якое прадставілі Нацкая і Доцішская ўстановы культуры.
Нацыянальныя падворкі — бясспрэчная асаблівасць фестывалю, але не адзіная. Горад майстроў часткова адлюстраваў цуды чалавечай працы і фантазіі ў розных тэхніках і з выкарыстаннем разнастайных матэрыялаў. Выстава-продаж не пуставала. Карысталіся попытам скураныя вырабы, з дрэва, канзашы з атласных стужак і іншыя.
“Класна!” — характарызавалі адпачынак дзеці, якія віхурылі ля надзімных атракцыёнаў і час ад часу ўтваралі чэргі за салодкімі прысмакамі. Дарослыя ж раз-пораз змянялі культурную праграму адпачынку ля сцэны на плошчы на сяброўскія размовы пад ценем дрэў у парку за столікамі. Моладзь на вуліцах святочнага пасёлка ажывілася бліжэй да вечара — іх чакалі дыскатэка і пенна-лазернае шоу.Удзельнікі свята дзеляцца ўражаннямі
Сям’я Казлоўскіх з Начы:
— Вяскоўцам у летні перыяд цяжка знайсці час, каб адпачыць такім чынам. Але сёння ўдала прыпаў выхадны. Мы працуем у КСУП “Доцішкі”. На фэст прыехалі не толькі для папаўнення фізічных і духоўных сіл, але і каб падтрымаць землякоў-працаўнікоў культуры. Цікава, эмацыйна, запамінальна!
Марыя Дзмітрук з Радуні:
— Стараемся не прапускаць такія падзеі. Гэта добрая магчымасць насычана бавіць час, сустрэцца з калегамі, так як зараз у мяне водпуск па догляду за дзіцем. Цікава назіраць, як растуць і развіваюцца выхаванцы мясцовай школы мастацтваў, дзе працую. Сёння, як і заўсёды, хлопцы і дзяўчаткі выступілі годна. Таму пацверджанне — апладысменты гледачоў. Малайцы, так трымаць!
Ганна Вікенцьеўна Грэмза з Радуні:
—Я — заўзятая прыхільніца “Лявонаў”. Такімі гуртамі ганарыцца не толькі Воранаўшчына, але і краіна. Хоць і працавала бухгалтарам у радунскім калгасе, але з маладосці заўсёды падтрымлівала культурны лад жыцця. На фестываль прыйшлі з сяброўкамі. Проста далоні збілі і голас амаль страцілі воклічамі “брава!” — так хочацца аддзякаваць артыстам.
На фестывалі пабывалі Галіна ШЛЕМПА
і Алег БЕЛЬСКІ (фота).