Метадычны практыка-арыентаваны семінар “Алімпіяды і навукова-даследчая праца па беларускай мове і літаратуры ў сучаснай школе” прайшоў у Забалацкім НПК
У мерапрыемстве прынялі ўдзел навукоўцы Гродзенскага дзяржаўнага ўніверсітэта імя Янкі Купалы” — кандыдаты філалагічных навук В.Л. Варановіч, Р.К. Казлоўскі, А.Э. Сабуць. Яны аказалі метадычную дапамогу настаўнікам школ раёна па эфектыўнай арганізацыі правядзення алімпіяд і навукова-даследчай працы па беларускай мове і літаратуры. Дыялог паміж гасцямі і педагогамі вёўся ў цёплай сяброўскай атмасферы. Былі акрэслены пытанні, на якія настаўнікі атрымалі канкрэтныя адказы і рэкамендацыі.
У рамках семінара адбылася творчая сустрэча членаў літаратурнага клуба Забалацкага НПК “Пегасік” з паэтамі, членамі Саюза пісьменнікаў Беларусі Русланам Казлоўскім і Алінай Сабуць. У імправізаванай студыі тэлеканала “Школьныя навіны” дарослыя і дзеці чыталі паэтычныя радкі пра родны край, прыроду, каханне. Не абмінулі і тэму вайны. Такія вершы гучалі асабліва выразна ў пачынаючых паэтаў — Анастасіі Мінгілевіч, Анастасіі Вярцінскай, Дар’і Венцкевіч, Віялеты Урублеўскай. Адчувалася, што кожны да гэтай сустрэчы рыхтаваўся загаддзя. Дзяўчынкі перажывалі, як успрымуць іх творы шаноўныя госці. Руслан Канстанцінавіч і Аліна Эдмундаўна вельмі ўважліва слухалі юных аўтараў, пасля шчыра падзякавалі за любоў да роднага слова і далі пэўныя рэкамендацыі па напісанню вершаў. Паэты адказалі на пытанні вядучых, пачыталі свае творы. Адведзеная на творчую імпрэзу гадзіна праляцела непрыкметна. Паэтам удалося наладзіць шчырую размову з дзецьмі. Напрыканцы мерапрыемства госці атрымалі сувеніры на памяць. Педагогам таксама былі ўручаны падарункі — зборнікі навуковых прац.
Пасля семінара дырэктар школы Надзея Юшэвіч арганізавала гасцям экскурсію па школе, разам наведалі школьны этнаграфічны музей “Спадчына”, дзе цікавым аповядам іх сустрэла загадчык Ф.С. Войшніс. Навукоўцаў уразілі сабраныя ў хатцы XIX стагоддзя экспанаты: мэбля, прылады працы для гаспадыні і гаспадара. Усё гэта навеяла ім цёплыя ўспаміны аб дзяцінстве.
Развітваючыся з гасцямі, педагогі дамовіліся, што падчас наступнай сустрэчы знаёмства прадоўжыцца.
Валянціна КОЦІК,
намеснік дырэктара Забалацкага НПК.
