Не старэюць душой ветэраны

У чацвёрты раз нашы “Землякі” ўдзельнічаюць у фестывалі. І трэба адзначыць, з кожным годам іх творчае майстэрства ўдасканальваецца, тым больш што ўліваюцца новыя сілы з ліку ветэранаў працы. У гэтым годзе вылучыцца сярод 13 калектываў хароў вобласці дапамагла сур’ёзная папярэдняя падрыхтоўка. Да святкавання 70-годдзя вызвалення Беларусі быў падабраны адпаведны матэрыял: песні пра вайну, родны край. Загаддзя былі пашыты новыя элегантныя сцэнічныя касцюмы, за што раённы савет ветэранаў выказвае падзяку начальніку аддзела адукацыі, спорту і турызму райвыканкама А.Я. Ганевіч, дырэктару Радунскай школы-інтэрната В.В. Міхалоўскаму і работнікам раённага ўнітарнага прадпрыемства бытавога абслугоўвання. А за матэрыяльную і арганізацыйную падтрымку — райвыканкаму і аддзелу ідэалагічнай работы, культуры і па справах моладзі.

Шэсць раз таленты Воранаўшчыны падымаліся на сцэну за ўзнагародамі. Самай вялікай радасцю стала прызнанне лепшым хора ветэранаў працы “Землякі” і адзначэнне яго Дыпломам за духоўнае і патрыятычнае выхаванне моладзі, прапаганду песні і актыўны ўдзел у культурным жыцці вобласці. Вельмі прыемна было атрымаць узнагароду галоўнага ўпраўлення ідэалагічнай работы, культуры і па справах моладзі аблвыканкама і народнаму ансамблю выкладчыкаў Воранаўскай дзіцячай школы мастацтваў “Гарэзлівыя струны” за лепшае аркестровае суправаджэнне. Адразу некалькі ўзнагарод атрымаў і Міхась Васільевіч Забалотны. Асабліва даспадобы прыйшоўся аўтару-выканаўцу нагрудны знак лаўрэата фестывалю. Да слова будзе сказаць, што гэта ўзнагарода была ўручана толькі траім чалавекам з Гродзенскай вобласці, сярод якіх і наш таленавіты зямляк.

Каміла КАНЕВІЧ.

На здымках: хор “Землякі”; М. Забалотны.

Фота з архіва Воранаўскага РМЦНТ і Алега БЕЛЬСКАГА.