Весяліцца — не забараняецца. Фінальныя акорды «Карнавала весялосці» на Воранаўшчыне
Пасля падвядзення вынікаў і ўзнагароджання пераможцаў фестываль не скончыўся. Узаемадзеянне з гледачамі прадоўжылася і пасля конкурснай праграмы. Яны не шкадавалі ўсмешак і сваіх далоняў для гучных апладысментаў. А гэта лепшая ўзнагарода таленавітым выступоўцам.
Рэпертуарны багаж народнага тэатра эстрадных мініяцюр «СуперСтар» г. Свіслач разнастайны — песенныя інсцэніроўкі, маналогі, пародыі, камічныя танцы і вершы-жарты. Воранаўскага гледача яны развесялілі пастаноўкай пра сустрэчу пакаленняў на дыскатэцы.
Маленькіх гледачоў парадавалі роставыя лялькі ўзорнага тэатра гульні «Лялькі для ўсіх» з г. Дзятлава. У арсенале калектыва каля 60-ці казачных персанажаў. З апошніх навінак — Губка Боб, хатнік-іншапланецянін Буба і лялька Лол. З іх удзелам адбылася цікавая гісторыя «Падарожжа каня Юлія ў 3/9 царства». Юныя гледачы ахвотна далучыліся да казачнай вандроўкі.
З цікавасцю назіралі дзеці і за прадстаўленнем тэатра эстрадных мініяцюр «Закрытыя твары» з Карэліцкага раёна.
Песенны блок распачалі артысты Палаца культуры г. Ліда, выступілі таксама народны ансамбль беларускай песні «Медуніцы», вакальны ансамбль «Варажэя» г. Іўе.
У вячэрняй праграме фестывалю — выступленне жаночай вакальна-эстраднай групы «ByCity», вогненнае шоу, святочная дыскатэка і лазернае шоу.
Вольга ВАРАБЪЁВА.
Фота аўтара і Сяргея ГРЫЧЫКА.